Қазақстан Словакияға уран сатуға дайын

Қазақстан президенті Қасым-Жомарт Тоқаев пен Словакия премьер-министрі Роберт Фицо бұқаралық ақпарат құралдары өкілдерінің алдында мәлімдеме жасады, деп хабарлайды Orda.kz.

Ақорданың баспасөз қызметі хабарлағандай, Қасым-Жомарт Тоқаев келіссөздер нәтижесінде нақты уағдаластықтарға қол жеткізілгенін атап өтті.

«Өзара тауар айналымын арттыру мәселесі қаралды. Қазақстан Словакияға мұнай, газ, уран, азық-түлік және басқа да тауарларды экспорттауға дайын. Сонымен қатар энергетика, машина жасау, ауыл шаруашылығы, цифрландыру және туризм салаларында бірлескен жобаларды іске асырудың әлеуеті бар. Әскери-техникалық ынтымақтастық бойынша да мол мүмкіндік бар. Бұдан бөлек, Транскаспий халықаралық көлік дәлізінің әлеуетін бірлесе пайдалану мәселесі талқыланды. Мен словакиялық әріптестерді осы жобаға қатысуға шақырдым. Ол екіжақты сауда үшін жаңа мүмкіндік ашады», — деді мемлекет басшысы.

Президент Словакияны Еуропадағы Қазақстанның маңызды әрі сенімді серіктесі ретінде атады. Ол экономикалық әріптестікке ерекше мән беру қажеттігін жеткізді. Өткен жылы екі ел арасындағы тауар айналымы 140 миллион доллар болды. Қазақстанда Словакия капиталы қатысқан 30-дан астам компания мен 22 бірлескен кәсіпорын жұмыс істейді.

Айта кетейік, Қытай Халық Республикасының төрағасы Си Цзиньпин Қазақстан президенті Қасым-Жомарт Тоқаевтың шақыруымен 16–17 маусым күндері ресми сапармен келеді.