Қазақстан президентінің туған күніне құттықтаулар келіп жатыр

Қасым-Жомарт Тоқаевты туған күнімен мемлекет басшыларынан алғашқы құттықтаулар келе бастады, деп хабарлайды Orda.kz.       

Ең алғашқылардың бірі болып Ресей басшысы Владимир Путин құттықтады. 

«Құрметті Қасым-Жомарт Кемелұлы! Туған күніңізбен шын жүректен құттықтаймын. Елдеріміз арасындағы стратегиялық әріптестік пен одақтастықты нығайтуға қосқан жеке үлесіңізді жоғары бағалаймыз. Бұл қарым-қатынастар бауырлас Ресей мен Қазақстан халықтарының игілігі үшін, Еуразия кеңістігінде қауіпсіздік пен тұрақтылықты қамтамасыз ету мақсатында бұдан әрі де табысты дамитынына сенімдімін. Сізге, құрметті Қасым-Жомарт Кемелұлы, шын жүректен зор денсаулық, амандық және мемлекеттік қызметіңізде табыс тілеймін» деп жазылған Кремль сайтында жарияланған хабарламада.

Сондай-ақ, Еуразиялық экономикалық комиссия алқасының төрағасы Бақытжан Сағынтаев та мемлекет басшысын құттықтады.

«ЕЭК алқасының төрағасы Қазақстан Республикасының президенті, Жоғары Еуразиялық экономикалық кеңестің мүшесі Қасым-Жомарт Тоқаевты туған күнімен құттықтады» деп хабарлады ведомствоның баспасөз қызметі. 

Бұған дейін Ақордада президент туған күнін атап өтпейтінін, бұл күнге орай ешқандай салтанатты шара жоспарланбағанын еске салған болатын.