Қазақстан Pfizer инновациялық вакцина өндірісін жолға қойған алғашқы ел

Қазақстан Еуразия мен Орталық Азиядағы Pfizer инновациялық вакцина өндірісін жолға қойған бірінші ел болады.

Pfizer және Roche фармацевтикалық компаниялары Қазақстанда вакцина өндірісін жолға қойып, республиканы дәрі-дәрмекпен қамтамасыз етеді. Келісімшартқа жаһандық инвестициялар бойынша VI қазақстандық дөңгелек үстелде қол қойылды, деп хабарлайды Orda.kz Денсаулық сақтау министрлігінің баспасөз қызметіне сілтеме жасап.

Қазақстан Бірыңғай дистрибьютор SK-Pharmacia және фармацевтикалық алпауыт Pfizer және Roche компанияларымен ұзақ мерзімді келісімшарттарға қол қойды.

Енді халықаралық биофармацевтикалық Pfizer компаниясы Қазақстан Республикасында инновациялық вакцина өндірісін іске қосып, 10 жыл ішінде елге 20 валентті пневмококк конъюгаттық вакцинасын жеткізуге міндеттеніп отыр.

Осылайша, Қазақстан Еуразия мен Орталық Азиядағы Pfizer ең жаңа вакцинаның келісімшарттық өндірісін іске қосатын бірінші ел болады.

Сонымен қатар, швейцариялық F. Hoffmann-La Roche Ltd компаниясы елімізде үш биотехнологиялық дәрі-дәрмектің ұзақ мерзімді келісімшарттық өндірісін жолға қойып, оларды өндіру технологиясын трансферттейді. Бұл Қазақстан Республикасы Денсаулық сақтау министрлігі мен Roche 2022 жылдың желтоқсанында қол қойған Локализация туралы келісім аясында жүзеге асырылады. Осы келісімнің арқасында ісікке қарсы соңғы дәрілер арзандап, науқастарға қолжетімді болады деп жоспарлануда.

Roche үш биотехнологиялық дәрі-дәрмектің жергілікті өндірісі үшін озық технологиялар мен ноу-хауды Қазақстанға тасымалдап, патенттелген түпнұсқалық дәрі-дәрмектерді жеткізеді.