Қазақстан Орталық Азияда инвестиция тарту бойынша көшбасшы

2024 жылы еліміз Солтүстік және Орталық Азиядағы инвестиция көлемі бойынша көшбасшы болып, 15,7 млрд долларлық жаңа жобаларды тартты, деп хабарлайды Orda.kz порталы «Kazakh Invest» баспасөз қызметіне сілтеме жасап.

 Осындай баяндаманы БҰҰ жанындағы Азия және Тынық мұхиты үшін экономикалық және әлеуметтік комиссиясы (ЭСКАТО) жариялады.

2024 жылдың қорытындысы бойынша еліміздегі инвестиция өсімі өткен жылмен салыстырғанда 88 пайызға жетті. Өңірдегі барлық тартылған инвестицияның 63 пайызы Қазақстан үлесінде.

Баяндамада келтірілген тізім келесідей:

• Өзбекстан – 4 млрд доллар (-49%);

• Қырғызстан – $2,1 млрд (+310%);

• Әзірбайжан – $1,2 млрд (+1%);

• Түркіменстан – $339 млн;

• Грузия – $126 млн;

• Армения – $67 млн.

Соңғы уақытта цифрландыру, технологиялық инновациялар және жасыл энергетика саласындағы жобалар халықаралық компаниялар тарапынан ерекше қолдау мен қызығушылыққа ие болып отыр.

«Бұл тұрғыда инвестициялық агенттіктер мен мүдделі министрліктердің белсенді жұмысы ерекше маңызды. Жаңа бағыттардың табысты болуы қолайлы саясат құруға ғана емес, сонымен қатар инвесторларды барлық кезеңде қолдауға, соның ішінде инвестициядан кейінгі қолдауға да байланысты» делінген хабарламада.

Сондай-ақ өткен жылы Қазақстанның аймақтағы негізгі инвестициялық хаб ретіндегі позициясын нығайта түскені атап өтілді. Республикада екі ірі іс-шара – Шетелдік инвесторлар кеңесі және еліміздегі жаһандық инвестиция бойынша  дөңгелек үстел өтті.

Бұған дейін Премьер-Министр Олжас Бектенов Қазақстанға инвестиция тарту туралы айтқан болатын.