Қазақстан мұнайын экспортқа шығару қымбаттайды

Мұнай құбырларының ұлттық операторы «ҚазТрансОйл» компаниясы 2025 жылдың 1 қаңтарынан бастап экспорттық мұнайдың тасымалдау тарифтерін көтереді, деп хабарлайды Orda.kz.

«ҚазТрансОйлдың» мәліметінше, тариф 11,3 пайызға көтеріледі. 1 қаңтардан бастап мың шақырымға бір тонна мұнай тасымалдау қызметі үшін ҚҚС-сыз 11,3 мың теңге (қазіргіден 1150 теңгеге артық) талап етеді. Бұл тек экспорттық жеткізілімдерге әсер етеді.

Оператор қосымша қызметтерге де тарифтерді көтереді: Мақат станциясында Кеңқияқ – Атырау мұнай құбырына мұнайды ауыстырып тиеу (тоннасы 2436 теңгеге дейін), Кеңқияқ станциясында (тоннасына 740 теңгеге дейін) және Атасу бас станциясындағы  «Атасу – Алашаңқай» мұнай құбырында (тоннасына 380 теңгеге дейін).

Тамыз айының басында «ҚазТрансОйл» ішкі нарықтағы мұнай айдау тарифтерін уақытша төмендету туралы шешім қабылдағанымен, 2025 жылдың 1 қыркүйегінен бастап оны қайтадан көтеретіні белгілі болды.