Қазақстан мен Вьетнам қылмыскер алмасады

22 қазанда сенаттың Конституциялық заңнама комитеті Қазақстан мен Вьетнам арасындағы сотталғандарды айырбастау туралы шартты ратификациялау заңын қарап, мақұлдауды ұсынды, деп хабарлайды Orda.kz.

Бұл шарт шетелде сотталғандарға өз Отанында жазасын өтеуге мүмкіндік береді. Ол олардың қалыпты өмірге тезірек оралуына және елдер арасындағы құқықтық ынтымақтастықты нығайтуға көмектеседі.

«Келісім бойынша, сотталған адам екі елдің бірінің азаматы болуы керек, жасалған қылмыс екі мемлекетте де қылмыс деп танылуы қажет. Сотталған адамның кемінде бір жыл жазасы қалуы және көшірілуге жазбаша келісімін беруі тиіс. Екі ел де бұл процеске келісуі керек», — деп мәлімдеді комитет төрағасы Нұрлан Бекназаров.

Құжатта тапсыру шарттары мен рәсімдері, сондай-ақ бас тарту себептері көрсетілген. Мысалы, тұтқындарды айырбастаудан бас тарту ұлттық қауіпсіздікке қауіп төнген жағдайда немесе басқа заңды негіздерге сәйкес мүмкін болады. Шартты орындау қосымша қаржылық шығындарды қажет етпейді.

Қазақстанның Украина, Қытай, Түркия және БАӘ сияқты 23 елмен осындай келісімдері бар.