Қазақстан мен Ресей бірлескен «Бәйтерек» зымыран кешенін құру барысын талқылады

Қазақстан Республикасы Премьер-Министрінің Бірінші орынбасары Роман Скляр Ресей Федерациясы Үкіметі Төрағасының орынбасары – Индустрия және сауда министрі Денис Мантуровпен кездесті, деп хабарлайды Orda.kz Қазақстан Республикасы Үкіметінің баспасөз қызметіне сілтеме жасап. 

Кездесуде «Байқоңыр» кешенінің негізгі мәселелері талқыланды. Тараптар бірлескен «Бәйтерек» ғарыш зымыран кешенін құру жобасының орындалу барысына ерекше назар аударды. Олар жобаны жүзеге асыру жұмыстары бұрын қол жеткізілген келісімдер мен жасалған шарттарға сәйкес жүргізіліп жатқанын атап өтті.

Кездесу барысында қазақстандық тарапқа жерүсті инфрақұрылымын құру және «Бәйтерек» ғарыш зымыран кешенін жаңғырту жауапкершілігі жүктелген жобаны іске асыруды жалғастыру бойынша одан әрі бірлескен іс-қимылдар тәртібі келісілді.

Сондай-ақ тараптар екіжақты ынтымақтастықтың өзекті мәселелерін және Байқоңыр қаласын дамыту перспективаларын талқылады. Атап айтқанда, Қазақстан Республикасы азаматтарына Байқоңыр қаласына кіруге/шығуға рұқсаттарды электронды түрде беру мәселесі талқыланды.

Кездесу қорытындысы бойынша екі жақ «Байқоңыр» кешені инфрақұрылымының әлеуметтік-мәдени әлеуетін тиімді пайдалану және дамыту мақсатында өзара іс-қимылды жалғастыруды келісті.