Қазақстан мен Оңтүстік Корея жаңа әуе рейстерін ашады

Қазақстан мен Оңтүстік Корея елдер арасындағы әуе рейстерінің санын арттырып, жаңа әуе бағыттарын ашады.

Бұл туралы көлік министрлігінің Азаматтық авиация комитеті хабарлады.

Сеулде Қазақстан көлік вице-министрі Талғат Ластаев пен Корея жер, инфрақұрылым және көлік министрінің орынбасары Юн Санг Ли арасында екіжақты кездесу өтті.

«Кездесу барысында тараптар Астана мен Сеул арасындағы әуе рейстерін қалпына келтіру, Алматы-Сеул бағыты бойынша рейстерді ұлғайту, сондай-ақ Шымкенттен Сеулге және Пусан мен Қазақстан қалалары арасында әуе рейстерін ашу мәселелерін талқылап, келісті» делінген хабарламада.

Сонымен қатар, Талғат Ластаев T’Way лоукостерлі авиакомпаниясы мен Sirius Airlines жүк авиакомпаниясының басшылығымен кездесулер өткізді, онда кореялық тасымалдаушылар Қазақстанға рейстерді орындау ниеттерін білдірді.