Қазақстан мен Қытай Алматы индустриалды аймағында автомобиль индустриялық паркін салмақшы

Astana Motors and Chery International Co., Ltd. ынтымақтастық туралы меморандумға қол қойды.

«Astana Motors» ЖШС мен Қытайдың Chery International Co., Ltd автомобиль жасау компаниясы Алматы индустриалды аймағындағы автоиндустриалды паркті бірлесіп салу саласындағы кәсіпорындар арасындағы стратегиялық серіктестікті дамытуды көздейтін Ынтымақтастық туралы меморандумға қол қойды, деп хабарлайды Қазақстан Республикасы Премьер-Министрінің баспасөз қызметі. 

Қытай тарапының шақыруымен Премьер-Министрдің бірінші орынбасары Роман Скляр Қытайдың маңызды индустриялық, инновациялық, ғылыми және білім беру орталықтарының бірі Аньхой провинциясының Хэфэй қаласына жұмыс сапарымен барды.

Роман Скляр Аньхой провинциясы партия комитетінің хатшысы Хань Цзюньмен және Аньхой провинциясы халық үкіметінің төрағасы Ван Цинсяньмен келіссөздер жүргізіп, тараптар сауда-экономикалық, инвестициялық, өнеркәсіптік, мәдени-гуманитарлық салалардағы ынтымақтастықты одан әрі тереңдетудің өзекті мәселелері және Қазақстан аймақтары мен Аньхой провинциясы арасындағы гуманитарлық ынтымақтастықты талқылады.

Қазақстандық делегация JAC Group ірі қытайлық автомобиль компанияларының бірі – JAC Xinggang және JAC NIO өндірістік базаларының, сондай-ақ Хэфэй экономикалық және технологиялық даму аймағының және қытайлық Sungrow Power Supply Co., Ltd.  энергетикалық компаниясының негізгі қызметімен танысты.