Қазақстан мектептерінде соңғы қоңырауды тойлау форматы қайтадан өзгерді

Биыл 186 мың мектеп түлегі үшін соңғы қоңырау соғылады, деп хабарлайды Orda.kz порталы.

Қазақ мектептерінде соңғы қоңырауды тойлау форматы өзгерді. Бұл туралы Білім министрлігінде өткен аппарат отырысында ведомство басшысы Ғани Бейсембаев мәлімдеді.

Министр биылғы оқу жылы 25 мамырда аяқталатынын тілге тиек етті.

«Бір жыл ішінде білім беру бағдарламаларын сәтті аяқтаған 3,8 миллионнан астам мектеп оқушылары келесі сыныптарға көшуі тиіс. 24 мамырда 1-10 сынып оқушылары үшін бірыңғай сынып сағатын өткізу жоспарлануда. Келесі күні, яғни 25 мамырда еліміздегі 186 мың мектеп түлегі үшін соңғы қоңырау өтеді деп жоспарланды», – деді министр. 

Бұл ретте Білім министрлігінің басшысы мерекелік шараны өткізу форматының өзгергеніне тоқталды.

«Биылғы мектеп бітірушілер бұл іс-шараны сән-салтанатсыз, рухани-адамгершілік деңгейде өткізетініне сенімдімін. Шараны алғаш рет жаңа форматта атап өтеміз. Бұл болашақ түлектер үшін жақсы дәстүрге айналатынына сенімдімін», - деді Ғани Бейсембаев. 

Сондай-ақ, облыстық білім басқармаларының басшыларына оқу жылының аяқталуын тиімді ұйымдастырып, қауіпсіздік шараларының сақталуын қадағалауды тапсырды.