Қазақстан Қытай мен Бразилияның Украинаға қатысты бейбітшілік жоспарын қолдайды – Тоқаев

Қазақстан Президенті Қасым-Жомарт Тоқаев Ресейдің Қазан қаласында өткен «БРИКС плюс» саммитіне қатысты, деп хабарлайды Ақорданың баспасөз қызметі.

«Мемлекет басшысы «БРИКС плюс» саммитіне қатысты. Президент Қасым-Жомарт Тоқаев Қазандағы БРИКС пленарлық отырысында «аутрич»/«БРИКС плюс» форматында сөз сөйледі, деп хабарланды.

Мемлекет басшысы БРИКС халықаралық тартылыстың жаһандық орталығына айналып келе жатқанын, оған өзара тиімді ынтымақтастыққа ұмтылған көптеген елдер іс жүзінде қызығушылық танытып отырғанын атап өтті.

«БРИКС-тің даму жолы орасан зор әлеуетке ие және әртүрлі континенттердегі мемлекеттерді біріктіреді, ынтымақтастықты нығайтады және барлық қатысушылардың игілігі үшін бірлескен мүмкіндіктерді тиімді пайдаланады. БРИКС-тің ортақ гүлдену, өзара құрмет пен серіктестік қағидаттарына негізделген болашақ құру үшін ресурстары да, тәжірибесі де жетерлік», - деді ол.

Қазақстан Президентінің айтуынша, БРИКС-тің көпжақты күш-жігері БҰҰ-ның қызметін үйлесімді толықтырады, ол таптырмас және әмбебап құрылым болып қала береді.

«БҰҰ Жарғысында бекітілген дипломатия мен диалог принциптері қақтығыстарды бейбіт жолмен шешуге және стратегиялық тұрақтылықты нығайтуға ықпал ететін БРИКС күн тәртібінің негізіне айналды. Біз Ресейдің өзара сенім мен ынтымақтастықты нығайту арқылы геосаяси шиеленісті азайтуға бағытталған Еуразияда тең және бөлінбейтін қауіпсіздікті құру тұжырымдамасын жоғары бағалаймыз.
Қазақстан Қытайдың халықаралық тұрақтылықты сақтауға, егемендікті қорғауға, көпжақты тәсілдерді қолдануға және жанжалдарды бейбіт жолмен шешуге бағытталған жаһандық қауіпсіздік бастамасын қолдайды. «Қазақстан жалпы Қытай мен Бразилияның Украинаға қатысты бейбітшілік жоспарын қолдайды», - деді Тоқаев.