Қазақстан қаржы министрлігі халықаралық конвенцияны бұзды

Қаржы министрлігі Алматыда жұмыс істейтін Польша компаниясынан 600 миллион теңгеден астам салықты заңсыз жинаған.

Прокурорлардың түсіндіруінше, Мемлекеттік кірістер департаменті Exalo Drilling компаниясының тұрғылықты жері туралы анықтаманы қабылдамай,  Қазақстан мен Польша арасында қосарланған салық салуды жою туралы конвенция жасалғанына қарамастан, оларға айыппұлды қосқанда 600 миллион теңгеден астам корпоративтік табыс салығын есептеген.

«Польша Қаржы министрлігі бірнеше рет қазақстандық тараппен даулы жағдайды өзара келісу процедурасын бастауға тырысты. Бұл конвенцияда нақты қарастырылған. Алайда Қаржы министрлігі келіссөздер жүргізуден бас тартты» деді Бас прокуратура.

Польшалық компаниясы салықтық тексеру нәтижелеріне сотқа шағым түсірді. Нәтижесінде, кәсіпкерлер төлейтін қосымша төлемдер жойылды.