Қазақстан халықаралық математика олимпиадасында тарихи нәтиже көрсетті

Солтүстік Македонияда математика бойынша өткен жарыста қазақстандық оқушылар тарихта болмаған нәтиже көрсетті, деп хабарлайды Orda.kz.

Қазақстандық оқушылар Солтүстік Македонияда өткен Балқан математика олимпиадасында төрт алтын медаль жеңіп алды. Білім бәсекесіне 24 елден оқушылар қатысты.

Барлық алтын медаль иегерлері – Алматы қаласының оқушылары.

• Әнуар Ағыбаев – Алматы қаласындағы NurOrda халықаралық мектебінің 9-сынып оқушысы;
•  Александр Олейников – Алматы қаласындағы NurOrda халықаралық мектебінің 9-сынып оқушысы;
•  Жәңгір Болат – Алматы қаласындағы Республикалық физика-математика мектебінің 8-сынып оқушысы;
•  Батырхан Бейғанов – Алматы қаласындағы Республикалық физика-математика мектебінің 9-сынып оқушысы.

Сондай-ақ, Ақтөбе облыстық «Білім-инновация» лицей-интернатының 9-сынып оқушылары тағы екі медаль жеңіп алды. Нұртай Мәлік күміс медаль, ал Мирас Кеңесбек есімді оқушы қола медаль иеленді.

«Қазақстан құрамасы жарыс тарихындағы ең үздік нәтижесін көрсетіп, төрт алтын, бір күміс және бір қола медаль жеңіп алды. Командалық есепте 24 ел қатысушылары арасында біздің оқушыларымыз екінші орынды иеленді» деп жазылған хабарламада.

Айта кетейік, Түркістан облысында 15 жастағы мектеп оқушысы 23 жастағы әскери қызметкерден жүкті болып, босанған еді.