Қазақстан ғана емес Еуроодақ та уақыт ауыстырудан бас тартуды ұсынды

Еуропарламенттің 66 депутаты Еурокомиссия басшысы Урсула фон дер Ляйенге кезекті уақыт өзгертуден бас тарту туралы шешімді орындау туралы талап жолдады, деп хабарлайды Orda.kz BILD басылымына сілтеме жасап.

«Зерттеулер уақыттың өзгеруі ұйқы режиміне кері әсер ететінін, инфаркт пен инсульт қаупін арттыратынын және жол-көлік оқиғалары санының артуына әкелуі мүмкін екенін көрсетті. Энергияны үнемдеу есебі мүлде орындалмады» делінген депутаттар мәлімдемесінде. 

2018 жылы парламент жылына екі рет ауысатын сағаттан арылуға дауыс берген. Бұл ЕО-ның 4,6 миллион азаматы арасында жүргізілген сауалнама оның күшін жоюды қолдайтынын көрсеткеннен кейін ұсынылды.

Содан кейін бұл шешімнің орындалуына пандемия және ұлттық үкімет деңгейіндегі бюрократтардың баяулығы кедергі болды. Бүгінде уақыт өзгерту мәселесі тағы да өзекті болып отыр, онымен көлік министрлері айналысатын болады.

Ал Қазақстанның бірнеше өңірінде уақытты екі сағатқа алға жылжыту ұсынылып отыр. E-Petition.kz порталында Энергетика министрлігіне тиісті петиция жарияланды. Бұл тәжірибені Орталық және Шығыс Қазақстанда, соның ішінде Астана, Алматы және Шымкентте енгізу ұсынылды. Естеріңізге сала кетейік, 1 наурызда Қазақстанда 13 облыс пен республикалық маңызы бар үш қала уақытты бір сағатқа артқа жылжытты.

Билік мұндай өзгеріс қазақстандықтарға пайда әкелетініне сендірді. Бұл бизнес-процестердің тұрақтылығын арттырады, тәуліктік ырғақтарды тұрақтандырады деген уәждер айтылды. Көп ұзамай бұл шешімнің күшін жоюды талап еткен петиция пайда болды, бірақ Энергетика министрлігі оны қолдамады.