Қазақстан Еуро-2024 іріктеу кезеңінің финалдық ойынында Словениядан ұтылды

Футболдан Қазақстан ұлттық құрамасы Еуро-2024 іріктеу кезеңінің финалдық ойынында Словениядан ұтылды.

Люблянадағы «Стожице» стадионында өткен кездесуде қазақстандық қорғаушы Ян Вороговский өз айып алаңында ереже бұзған соң есепті 42-минутта словениялық шабуылшы Беньямин Шешко пенальтиден ашты. Екінші таймның басында Қазақстан құрамасының жартылай қорғаушысы Рамазан Оразов есепті теңестіргенімен, негізгі уақыт аяқталуға төрт минут қалғанда алаң иелері қайтадан алға шықты – жартылай қорғаушы Бенджамин Вербич гол соқты.

Қорытынды есеп 2:1 Словения құрамасының пайдасына.

Кездесудегі жеңіс «Н» тобында топ жарған словендер мен даниялықтарға 2024 жылғы Еуропа чемпионатының негізгі кезеңіне жолдама алуға мүмкіндік берді.

Топта Финляндия үшінші, Қазақстан төртінші орын алды. Солтүстік Ирландия мен Сан-Марино құрамасы топтағы турнирлік кестеде бесінші және алтыншы орындарды иеленді.

Қазақстан топты алты жеңіс және төрт жеңіліспен аяқтады.

Бұл ретте Қазақстан Ұлттар лигасының плей-офф кезеңіне қатысуына байланысты Еуро-2024 финалдық кезеңінде бақ сынау мүмкіндігін әлі де сақтап қалды, онда қазақстандық құрама Грекия құрамасымен ойнайды.