Қазақстан еті Түркия нарығына жол тартты

Қазақстан еті үшін Түркия нарығы ашық.

Бұл туралы ауыл шаруашылығы министрлігінің баспасөз қызметі хабарлады.

«7 маусымнан бастап Түркия нарығына қазақ етін жеткізуге кедергі болған шектеулер алынып тасталды. Атап айтқанда, құс тұмауына қатысты 2005 жылдан бері қолданылып жүрген тыйымдар, сондай-ақ 2016 және 2022 жылдары аусыл мен түйіндік дерматитке қатысты шектеулер алынып тасталды» делінген хабарламада. 

Ауыл шаруашылығы министрі Айдарбек Сапаров наурыз айында Түркі мемлекеттері ұйымы отырысында бұл мәселені көтеріп, Түркия нарығы олар үшін жабық болғанымен, Қазақстанның ет экспорттауға дайын екенін атап өтті.

«Қазақстан өнімін ілгерілетудің келесі қадамы – ветеринарлық талаптарды үйлестіру. Бұл мәселелер биылғы жылдың тамыз айында Айдарбек Сапаровтың Түркияға сапары кезінде талқыланады» деп толықтырды министрлік.