Қазақстан Екатерина Биволды ұстау үшін Ресеймен байланыс орнатты

ҚР Ішкі істер вице-министрі Санжар Әділов бокстан әлем чемпионы Дмитрий Биволдың жұбайы Екатерина Биволды ұстау үшін Ресеймен байланыс орнатылғанын мәлімдеді, деп хабарлайды Orda.kz.

Вице-министрдің айтуынша, Ішкі істер министрлігі Ресей Федерациясының полиция қызметкерлерімен тығыз қарым-қатынаста жұмыс жүргізіп жатыр.

«Тергеу амалдары әлі де жалғасып жатыр. Қазірдің өзінде халықаралық іздеу жарияланды, сырттай қамауға алу туралы шешім қабылданды. Біз Ресейдің құқық қорғау органдарымен байланыстамыз. Егер Биволдың жұбайы ұсталған жағдайда, бас прокуратура арқылы хабар аламыз немесе экстрадиция мәселесін қарастырамыз», – деп мәлімдеді бейсенбі күнгі Сенат аумағында. 

Айта кетсек, Екатерина Бивол бұған дейін өз Telegram-арнасында қазақ пен қырғыз халқына тіл тигізген бейнежазба жариялаған еді. Осы оқиғадан кейін Қырғызстан Республикасы оған бірінші болып іздеу жариялады. Ал бірнеше күн бұрын Дмитрий Биволдың әкесі Юрий Бивол келінін соққыға жығып, оның мұрнын сындырғаны хабарланды.