Қазақстан Дүниежүзілік көшпенділер ойындарына қанша млрд жұмсамақ?

Қазақстан Дүниежүзілік көшпенділер ойындарын өткізу үшін 5,7 миллиард теңге бөлетін болды, деп хабарлады Orda.kz.

Бұл ақпаратты ОҚК-де өткен брифингте Дүниежүзілік ойындарға дайындық дирекциясының орынбасары Абылай Қоңдыбаев мәлімдеді. 

«Мемлекеттік бюджет осы ойындарға 5,7 миллиард теңге бөлді. Негізгі шығындар қонақтардың тұруы мен тамағын қамтамасыз етуге жұмсалады», – деді Қоңдыбаев.

Ойындарға 2314 спортшы қатыспақ.

«Біздің ұлттық құрама барлық ойындарға қатысқан. Дәстүр бойынша қабылдаушы ел әрқашан келген қонақтардың шығындарын өз мойнына алады», – деп атап өтті Қоңдыбаев.

Әр қонаққа еліміз шамамен 1,8 миллион теңге жұмсайды. «Ұлттық және ат спорты орталығының» директоры Бақдәулет Сәбитов ойын барысында 21 спорт түрі бойынша 97 медаль жиынтығы сарапқа салынатынын айтты.

V Дүниежүзілік көшпенділер ойындары Астанада 8-13 қыркүйек аралығында өтеді. Шара кезінде қала бойынша арнайы автобустар жұмыс істейді, олар таңертеңгі 8.00-ден кешкі 20.00-ге дейін қатынайды.