Қазақстан БҰҰ-ның азық-түлік пен климат бойынша пилоттық жобасына қатысады

Қазақстан климаттың өзгеруі жағдайында азық-түлік қауіпсіздігі мен тұрақты ауыл шаруашылығын нығайту бойынша пилоттық жобадағы БҰҰ таңдаған бес елдің қатарында, деп хабарлады Ауыл шаруашылығы министрлігінің баспасөз қызметі.

«Қазақстан азық-түлік қауіпсіздігі және климаттың өзгеруі бойынша пилоттық жобаны жүзеге асыру үшін БҰҰ таңдаған бес елдің бірі болды»,  деп атап өтті министрлік. 

Астанада Қазақстан Республикасы Ауыл шаруашылығы министрлігі Біріккен Ұлттар Ұйымының Азық-түлік және ауыл шаруашылығы ұйымымен (АШҰ) бірлесіп ұйымдастырған «Конвергенция бастамасы – Қазақстандағы азық-түлік жүйелері мен климаттық әрекет арасындағы синергияны нығайту» атты ұлттық семинар өтті.

Семинарда тұрақты ауыл шаруашылығы, азық-түлік қауіпсіздігін арттыру және климаттың өзгеруімен күрес бойынша бірлескен стратегиялар талқыланды.

Шарада Азық-түлік жүйелері жөніндегі ұлттық үйлестіруші Назгүл Хатепова  сөз сөйлеп, Қазақстанның климатқа төзімді тәжірибелерді белсенді түрде енгізіп жатқанын және жаңа экологиялық сын-қатерлерге жауап беретін аграрлық саясат әзірлеп жатқанын атап өтті.

Семинар елдегі  жағдайды бағалауға, олқылықтарды анықтауға және азық-түлік жүйелері мен Қазақстандағы климаттық іс-әрекеттердің тиімді жақындасуын анықтауға бағытталған.