Қазақстан бокс федерациясының жаңа басшысы сайланды

Шахмұрат Мүтәліп федерация президенті болды. Ол бұл қызметте Кеңес Рақышевты алмастырды.

Жыл сайынғы дәстүрлі жиында ҚБФ жаңа басшысын сайлау өтті.

«Мен еліміздің боксын одан әрі дамыту, спортшыларымызға жан-жақты қолдау көрсету, олардың мүдделерін қорғау, ҚБФ-ның ел ішінде және халықаралық деңгейде рөлін арттыру үшін қолдан келгеннің бәрін жасаймын. Біз өз тарапымыздан барлық қажетті дайындықтарды жалғастырамыз»,- деді Шахмұрат Мүтәліп.

Кеңес Рақышев 2019 жылы федерацияға «мүдделер қақтығысын болдырмау үшін» қызметінен кетуге шешім қабылдаған Тимур Құлыбаевтың орнына келген еді. Дегенмен Құлыбаев бүгінге дейін бокстың дамуын қадағалап келеді. Федерация сайтында ол құрметті президент ретінде басшылық қатарында көрсетілген.