Қазақстан бірқатар елдермен ынтымақтастықты арттыруға ниетті

Қазақстан бірқатар елдермен ынтымақтастықты арттыруға ниетті, деп хабарлайды Сыртқы істер министрлігінің баспасөз қызметі.

«Қазақстанның Жапониядағы Елшісі Сабыр Есімбеков Жапонияның Парламенттік Қоршаған ортаны қорғау вице-министрі Кентаро Асахиді жоспарланған екіжақты және көпжақты іс-шаралар туралы хабардар ете отырып, жасыл энергетика, қоршаған орта және қоршаған орта  мен декарбонизация саласындағы ынтымақтастықты одан әрі дамыту әлеуетін атап өтті» делінген хабарламада.

Асахи экология және қоршаған ортаны қорғау саласындағы екіжақты ынтымақтастықтың дамуын жоғары бағалап, жасыл энергетика және декарбонизация саласындағы жобаларды одан әрі жүзеге асыруға қызығушылық танытқаны хабарланды. Кездесу қорытындысы бойынша тараптар жасыл энергетиканы дамыту және декарбонизация саласындағы ынтымақтастықты одан әрі дамыту үшін тығыз өзара іс-қимылды жалғастыруға келісті.

Сондай-ақ Пәкістанның Пенджаб провинциясы қазақстандық аймақтармен ынтымақтастықты арттыруға ниетті екені атап өтілді.

«Кездесу барысында Қазақстанның Пәкістандағы Елшісі Ержан Қыстафин Қазақстан-Пәкістан күн тәртібі, ынтымақтастықты нығайту және байланыс арналарын кеңейтуге бағытталған атқарылып жатқан және жоспарланған іс-шаралар туралы хабардар етті, Пенджаб провинциясымен қарым-қатынасты дамыту қажеттілігіне ерекше тоқталды» делінген хабарламада.

Пәкістанның жетекші Пенджаб провинциясының бас министрі Мәриям Наваз Шариф Қазақстанның Орталық Азия аймағындағы маңызды серіктес болып саналатынын атап өтіп, провинцияаралық ынтымақтастықты арттыруға бағытталған бастамаларға жан-жақты қолдау көрсетуге дайын екенін білдіргені атап өтілді. 

Қыстафиннің Пенджаб басшысын 2024 жылы Қазақстанға келуге шақырғаны да хабарланды. Өз кезегінде Шариф екіжақты ынтымақтастықты кеңейтуге қосымша серпін беру үшін елімізге келуге шақыруды ризашылықпен қабылдады.

Сонымен қатар, Қазақстан мен Индонезияның инвестиция саласындағы ынтымақтастықты кеңейтуге ниетті екендігі атап өтілді.

«Қазақстан Республикасы Үкіметі мен Индонезия Республикасы Үкіметі арасындағы инвестицияларды көтермелеу және өзара қорғау туралы келісім жасау бойынша келіссөздердің екінші раунды өтті» делінген хабарламада.

Келіссөздерге Қазақстан тарапынан Сыртқы істер, Әділет, Сауда және Интеграция министрліктерінің, сондай-ақ Қазақстан Республикасының сот әкімшілігінің және «Kazakh Invest» ҰК» АҚ өкілдері қатысқаны атап өтілді. Индонезия тарапынан келіссөздерге Сыртқы істер министрліктерінің, Инвестициялар және Қаржы қызметтері әкімшілігінің өкілдері қатысты.

Іс-шара нәтижесінде тараптар жоғарыда аталған келісім жобасының мәтініндегі барлық негізгі мәселелер бойынша тұжырымдамалық келісімге қол жеткізгені көрсетілген. Келесі тур 2024 жылдың маусым айында бейнеконференцбайланыс арқылы өтеді деп жоспарланған.