Қазақстан әскері қауіпсіздік үшін Aitu мессенджеріне көшеді

Қазақстан Қарулы күштері қызметтік ақпарат алмасу үшін отандық Aitu мессенджеріне көшеді, деп хабарлайды Orda.kz.

Бұл шешім мемлекет басшысы Қасым-Жомарт Тоқаевтың тапсырмасымен жүзеге асырылып отыр.

«Отандық мессенджерге көшу – мемлекеттік құрылымдарда, оның ішінде қорғаныс саласында да қызметтік ақпаратты қорғау деңгейін арттыруға бағытталған негізгі қадамдардың бірі. Бұған дейін деректерді жіберу үшін көбінесе шетелдік мессенджерлер қолданылған. Бұл өз кезегінде қауіпсіздікке белгілі бір қатер төндірген еді. Қазақстан юрисдикциясында орналасқан және деректерді сақтау мен өңдеу талаптарына толық сәйкес келетін Aitu мессенджерін пайдалану ақпарат ағынын бақылауға мүмкіндік береді»,  деп хабарлады Қорғаныс министрлігі.

Қорғаныс министрінің цифрландыру жөніндегі орынбасары Дархан Ахмедиевтің айтуынша, Aitu қызметтік деректердің сыртқа таралуына жол бермей, ақпарат қауіпсіздігін қамтамасыз етеді.