Қазақстан АрселорМиттал Теміртауды мемлекетке беру жөніндегі мәмілені аяқтап жатыр

Қазақстан Премьер-министрі Әлихан Смайылов Қарағанды облысындағы Костенко атындағы шахтадағы қайғылы оқиғаға түсініктеме берді. Ол «АрселорМиттал Теміртау» АҚ басшылығын жұмыс пен қызметкерлерге жауапсыз қарағаны үшін сынға алды.

Үкімет отырысы қайтыс болған 45 кеншіні үнсіз еске алумен басталды. Смайылов бірінші болып президент Тоқаевтың «АрселорМиттал Теміртау» компаниясымен инвестициялық ынтымақтастықты тоқтатуды тапсырғанын еске салды.

«Осы жылдың тамыз айында «АрселорМиттал Теміртауда» осындай апат орын алған еді. Содан кейін бес шахтер қаза тапты. Көптеген құрбан болған қайғылы оқиға өнеркәсіптік қауіпсіздік саласындағы бұзушылықтармен тікелей байланысты. Бұл, ең алдымен, кәсіпорын басшылығының кінәсі. Оның компания жұмысына жауапсыздығы  бірнеше жылдан бері қайғылы салдарға алып келуде»,  – деді премьер-министр.  

Смайылов компания өз міндеттемелерін орындамағанын айтты. Сондықтан қазір Қазақстан «АрселорМиттал Теміртауды» мемлекет пайдасына беру жөніндегі мәмілені аяқтауда. Комиссия апат себептері мен кінәлілерді анықтауды жалғастырады. Қарағанды облысының әкімдігі мен төтенше жағдайлар министрлігіне апатты жою жөнінде шаралар қабылдау тапсырылды. 

«Ең бастысы – қаза тапқандардың отбасыларына жан-жақты көмек көрсету және зардап шеккендердің денсаулығын қалпына келтіру. Бұл қиын жағдайда ешкім назардан тыс қалмайды», - дейді Смайылов. 

Құтқарушылар 45 кеншінің мәйітін және 46-шы қаза тапқан адамның қалдықтарын тапты. Қайтыс болған 40 адамның жеке басы анықталды, алтауы анықталмады. Оларды сәйкестендіру үшін қажетті сараптамалар жүргізіледі. ДНҚ анализі қажет болады. Тірі қалған тағы екі шахтер ауруханада жатыр.