Қазақстан анықтай алмаған жұмбақ ауру — Ермұрат Бәпи

Бүгін  депутат Ермұрат Бәпи мәжіліс дәлізінде неге Германияға барып емделіп келгенін айтты. 

Бұл туралы Orda.kz хабарлады. 

Мәжілісмен 2020 жылы ресейлік оппозиционер Алексей Навальный тексерілген Берлиндегі әйгілі Шарите клиникасында медициналық диагностикадан өтті.

Бұған дейін Бәпи денсаулығына қатысты мәселелерге шағымданған – оның денесінде бірнеше ай бойы ісік пайда болған. Оның нақты сипатын қазақстандық мамандар анықтай алмады. 

Бүгін ол «улану» жайлы өз сөзінде күдігі болғанын, ал өзінің олай «уландым» деп айтпағанын баяндады.

«Германияда клиникада оншақты күн диагностика жүргізді. Анықталған дүние — организмдегі бір-біріне қарама-қайшы препараттардың қақтығысы екен. Менің өзімде уланды деген күдік қана болған. Бұл мәселені Orda.kz сайтына интервью берген жігіттер айтып жүр. Содан ары қарай тарап кеткен ғой. Маған сылтау қажет емес. Бұл еуропаға бару үшін болған сылтау да емес. Осы қазақстанда менің диагнозым анықталмады. 3 бірдей клиникаға қаралдым. Анықталмаған соң, еуропаға баруға мәжбүр болдым. Өте ауыр сырқат болды. Қазірдің өзінде ол ауық-ауық қайталанып тұр», — деді Ермұрат Бәпи.

Еске сала кетсек, бұған дейін Ермұрат Бәпи посткеңестік кеңістікте кеңінен қолданылатын кейбір умен уланған болуы мүмкін деген болжам тараған болатын. 

Бұған дейін Orda.kz Ермұрат Бәпидің жұмбақ ауруының себебін анықтау үшін Германияға ұшып кеткенін жазған болатын.