Қазақ тілін дәріптеп жүрген неміс қызын кім қорқытты?

«Alash» клубының негізін қалаушы, қазақ тілінің жанашыры, 7 жылдан бері тіл үйретумен айналысып келген Алина Кан өзін жуырда біреулер қорқытып, үстінен полицияға арыз жазбақ болғанын мәлімдеді. 

Orda.kz тілшісі Алина Канға хабарласып, сұхбаттасты.

Қазақ тілін не себепті дәріптеп жүрсіз?

Мен қазақ тілін жақсы көремін. Бала кезімнен қазақ тілі пәнінің мұғалімі болғым келді. Ұстаздық ету – мен үшін хобби! Солай хоббиім қазір айналысып жүрген мамандығыма айналды. Неге дәп қазақ тілі дейсіз бе? Бала кезімнен орыс тілінде оқыдым. Сондықтан бұл жолым оңай болды деуге келмейді. Сырттай қарағанда оңай көрінуі мүмкін. Бірақ үйрендім. Мен қазақ тілін жетік әрі тез үйренудің жолдарын білемін. Сол тәжірибемді көрсетуге деген құштарлығым мені осы салаға құлшындырды.

Қазақ тілін үйретуде қандай қиындықтар болды?

Қиындық кез келген салада бар. Менің салам да одан ада емес. Кейбір оқушылар тез әрі оңай үйренеді. Бірақ оқытуды іліп алып кете алмайтындар да бар. Мен барынша оңай тәсілдермен түсіндіремін. Бірақ көп адам оңай үйреніп кете алмайды. Сондықтан кейде оқыту ұзаққа созылып жатады. 
Оқушылар тарапынан сын естіген емеспін. Көбіне желідегі жазылушылар айтып жатады. 

Сізді ұлтараздық тудырушы деп айыптағанда қандай күй кештіңіз? Сіздің үстіңізден арыз жазамыз деп қорқытқандар арызын жазды ма?

Әрине, мұндайда жақсы күй кештім деп айта алмаймын. Көбі видеоларымның түпкі ойын түсініп жатады. Дегенмен бәрін керісінше түсініп, ұқпайтындар да бар. Олар мені қазақ тілінде сөйлемейтіндерді шеттетіп жатыр деп ойлайды. 
Жуырда біреу маған қоқан лоққы көрсетті, полицияға арыз жазбақ болды. Көбіне мен мұндай жағдайларға мән бермей жүре беретінмін. Бірақ дәл осы қорқытуға көз жұмып қарай алмадым. 

Жастар арасында қазақ тілін көтеру үшін не істеу қажет деп ойлайсыз?

Қазір бәрі трендтерді тикток пен инстаграмнан алады. Медиада аты шыққан адамдар, аудиториясы көп жұлдыздар қазақ тілі туралы жаңа, қызық нәрселерді жарыққа шығарса, процесс жылдам жүрер еді. Қазір бәрі трендт қуады. Мен өзім қазақ тілін үйренгісі келетін, бірақ қиналып жүргендерге бір пайдам тисе деймін. Оқушылардың көбі орыстілді болғаны жанға батады. Көптеген ата-аналар мектептегі қазақ тілі бағдарламасы түсініксіз деп шағымданып жатады. Бұны бір деңіз. Екіншіден, қазақ тілі мұғалімдері балалардың үйренуге деген құлшынысын оята білмейді. Бір өкініштісі —  осы болып тұр.

Менің бейнежазбамда қазақ тілін білу — міндетті деген емес, қазақ тілін білу — қазақ халқына деген құрмет болады деген ой жатыр. Алайда, хейтерлер бұл сөзді бұрмалап, «егер біз тілді білмесек, қазақ халқын сыйламайды деген сөз бе? Неге сіз бұлай дейсіз, бұл дау тудырады» деген пікірлер жазады. Бір қызығы, мені қазақтардың бәрі қолдады және ешқандай дау болмады. Қарсы шыққандар – бір ауыз қазақша білмейтін адамдар. Шынымды айтсам, «жасымыз үлкен», «тіл үйрену қиын» деген сылтауларды түсінбеймін. Шын мәнінде кез келген елде мемлекеттік тілді білмесең, жұмысқа алмайды. Мысалы, Ресейде немесе басқа ТМД елдерінде солай. Еуропада бұл талап одан да қатаң қойылған.

Ал Қазақстанда ешкім ешкімді бөліп-жармайды. Бәрі бірлікте күн кешіп келеді және өздеріне оңай тілде сөйлейді. Алайда әйтеу бәрібір риза болмайтын адамдар шығып жатады ғой.
 Менің ойымша, Қазақстанда тұрып жатқанымызды ұмытпауымыз керек!

Сұхбатыңызға рахмет!