Қазақ циркінің қайраткері Қадылбек Күнгіжінов өмірден озды

Қазақ цирк өнерінің, ат үсті акробатикасының даңқты шебері, Астаналық цирктің «Сарыарқа жігіттері» ансамблінің жетекшісі, Қазақстанның еңбек сіңірген қайраткері Қадылбек Тұрсынғалиұлы Күнгіжінов өмірден өтті, деп хабарлайды Orda.kz.

Қадылбек Тұрсынғалиұлы еңбек жолын 1986 жылы бастап, Қазақ мемлекеттік циркінде ұзақ жылдар бойы өнер көрсетті. Ол АҚШ, Канада, Оңтүстік Африка, Италия, Қытай, Түркия және ТМД елдерінде өнерін паш етті.

Астаналық цирктің қалыптасуына өлшеусіз үлес қосып, алғашқы күннен бастап шығармашылық ұжымның жүрегі, шабыт берушісі болды. Оның жетекшілігіндегі «Сарыарқа жігіттері» ансамблі халықаралық байқаулар мен фестивальдерде талай мәрте топ жарып, қазақ цирк өнерінің мәртебесін асқақтатты.

Orda.kz редакциясы марқұмның жұбайы Салтанат Күнгүжіноваға, балаларына және Күнгүжіновтер әулетіне қайғыра көңіл айтады.