Қазақ бапкері Тунис еліне жеңіс сыйлады

Қазақ бапкері жаттықтырған спортшылар Тунис еліне қола медаль алып берді.

Тунистің alkhaleej ақпараттық порталы Тунис құрамасы таеквондодан қола медаль алғанын хабарлады.

Париждегі жазғы Олимпиада ойындарында Тунис құрамасы таэквондодан қола медальға қол жеткізді. 58 келі салмақ дәрежесінде жекпе-жекке шыққан Мохамед Халил Джендубидің бапкері қазақстандық Есбол Сұлтанов екені мәлім болды.

Есбол Сұлтанов 2023 жылдың қыркүйек айында Тунис құрамасының бас бапкері болып тағайындалды. Оның жаттықтыруымен Тунис құрамасынан 4 таеквондошы Олимпиадаға жолдама алған еді.

Есбол Сұлтанов спортшы ретінде Қазақстанның атынан 2007 жылы Бейжіңде өткен әлем чемпионатында ерлер арасында 72 кг дейінгі салмақ дәрежесінде бақ сынаған. Сондай-ақ, 2006 жылы Дохада өткен Азия ойындарында және 2007 жылы Бангкокта өткен жазғы Универсиадада сайысқа түсті.