Қазақстан ҰҚШҰ құрамынан шыға ма? - СІМ жауабы

Қазақстанның ҰҚШҰ-дан шығу туралы жариялайтыны туралы қауесет соңғы бірнеше күнде әлеуметтік желілер мен мессенджерлерде белсенді түрде тарап жатыр. Алайда елдің сыртқы істер министрлігі бұл ақпаратты жоққа шығарды.

ҚР СІМ Қазақстан ұйымды құрудың бастауында тұрғанын және оның белсенді қатысушысы болып табылатынын мәлімдеді. Ал ҰҚШҰ-ға мүше болу елдің ұлттық мүдделеріне толық жауап береді.

«Ұжымдық қауіпсіздік туралы шартта оған қатысушы мемлекеттер үшін, оның ішінде Қазақстан үшін де қауіпсіздікті қамтамасыз етуге заңды түрде міндеттейтін кепілдіктер көзделген. Бұдан басқа, ҰҚШҰ шеңберінде халықаралық терроризмге, заңсыз көші-қонға, есірткінің заңсыз айналымына, трансшекаралық қылмыстылыққа, ақпараттық саладағы қатерлерге бірлесіп қарсы іс-қимыл жасау дағдылары пысықталып жатыр.

Осылайша, ҰҚШҰ аясындағы ынтымақтастық Қазақстанның сыртқы саясатының маңызды бағыты болып табылады, біздің еліміздің ҰҚШҰ-ға қатысуы Қазақстанның ұзақ мерзімді стратегиялық құжаттарында көзделген.

Жалпы, Қазақстан Ұжымдық қауіпсіздік туралы шарт ұйымынан шығу мүмкіндігін қарастырмайды деп нақты мәлімдеуге болады» деп хабарлады Қазақстан СІМ.