Қасым-Жомарт Тоқаев Ресей газын Қазақстан арқылы өткізуге рұқсат берді

Тоқаев, Путин және Мирзиеев ресейлік газды жеткізу рәсіміне қатысты. Енді Ресейден көгілдір отын Өзбекстанға Қазақстан арқылы транзитпен жетеді. Оның бір бөлігі жоспарға сәйкес Қазақстанға жеткізіледі.

Телекөпір барысында Атырау облысындағы Мақат компрессорлық станциясынан Энергетика министрі Алмасадам Сатқалиев Орталық Азия – Орталық газ құбырының қазақстандық бөлігінің дайындығы туралы баяндады. Ресей газын Өзбекстанға жіберер алдында Қасым-Жомарт Тоқаев еліміздің аумағы арқылы өтетін құбырды іске қосуға рұқсат берді.

Мәскеуде үш мемлекет басшыларының кездесуі өтіп, онда президенттер ынтымақтастықтың жаңа кезеңі туралы пікір алмасты. Бұл көлік жүйелерінің бүкіл тарихында Ресейден шыққан және ресейлік өндірістегі газ Орталық Азияға ешқашан жіберілмегені атап өтілді. Ал Қасым-Жомарт Тоқаев өз сөзінде бұл тарихи оқиға Қазақстан, Ресей және Өзбекстанның энергетика саласындағы стратегиялық ынтымақтастық пен өзара іс-қимылды сапалы жаңа деңгейге көтеріп, елдер арасындағы тату көршілік қарым-қатынастар шежіресіне тағы бір жарқын бет ашатынын атап өтті.

«Мемлекеттеріміздің тұрақты әлеуметтік-экономикалық ілгерілеуінде газ өнеркәсібі қомақты әрі ерекше рөл атқарады. Сондықтан бұл жоба барлық қатысушы тараптардың мүддесіне сай келеді. Қазақстан өз аумағындағы магистральдық газ құбырын дайындауды дер кезінде және толық көлемде аяқтады. Жоба Ресей газын экспорттауды әртараптандыруды қамтамасыз етеді. Қазақстанның газ тасымалдау инфрақұрылымын кеңейтуге және жаңғыртуға ықпал етеді және Өзбекстанның жылына 3 миллиард текше метрге дейінгі табиғи газға өсіп келе жатқан қажеттіліктерін қанағаттандыруға мүмкіндік береді.  Ол сондай-ақ елдеріміздің индустриялық дамуына қуатты серпін береді, бизнес-климат пен азаматтардың өмір сүру деңгейін жақсартады», – деді Қазақстан Президенті. 

Ол Қазақстан аумағы арқылы жылдық өткізу қабілеті 255 миллиард текше метрге дейінгі 20 мың шақырымнан астам магистральдық газ құбырлары өтетінін түсіндірді. Қазақстан өзінің транзиттік әлеуетін толық пайдалануға мүдделі және ресейлік газ тасымалдау көлемін одан әрі арттыруға дайын.

Естеріңізге сала кетейік, жоба осы жылдың маусым айында келісілген болатын. Одан кейін «Газпром» мен Өзбекстанның Энергетика министрлігі ресейлік газды жеткізу туралы келісімшартқа қол қойды. Сонымен қатар, Газпром мен QazaqGaz Өзбекстандағы тұтынушылар үшін ресейлік газды Қазақстан арқылы тасымалдау туралы келісім жасасты. Екі жылдық келісімшарт бойынша жеткізілім көлемі 2,8 млрд текше метр болды.