Қасым-Жомарт Тоқаев FАО бас директорына Алматы апортының дәмін татқызды

Мемлекет басшысы Қасым-Жомарт Тоқаев FАО бас директоры Цю Дунъюмен кездесу барысында Алматы апортының жемісін көрсетті, деп хабарлайды Ақорда.

«Қазақстан алманың отаны ретінде кеңінен танымал. Апорт алмасы еліміздің ең ірі мегаполисі Алматының маңында өседі. Біз осы сортты әлемдік нарыққа шығару үшін бірлесіп жұмыс істеуді көздеп отырмыз. Бұл бастаманы ілгерілетуде сіздердің жеке қолдауларыңызға сенемін», - деді Президент.

Мемлекет басшысы халықаралық Аралды құтқару қоры мен Азық-түлік қауіпсіздігі жөніндегі Ислам ұйымының төрағасы ретінде еліміздің басым бағыттарына да тоқталды.

Қасым-Жомарт Тоқаев FАО -ны Арал бассейніндегі мелиорация және су ресурстарын басқару жобаларын әзірлеуге қолдау көрсетуге шақырды. Ол сондай-ақ Қазақстанда Орталық Азия ұйымының субөңірлік кеңсесін құруды ұсынды.

Азық-түлік және ауыл шаруашылығы ұйымының бас директоры Қазақстанның жаһандық азық-түлік қауіпсіздігін қамтамасыз етудегі және аймақта ғана емес, бүкіл әлемде гуманитарлық көмек көрсетудегі маңызды рөлін атап өтті.

Соңында Мемлекет басшысы FАО басшысына мазмұнды әңгімесі үшін алғыс айтып, оны алдағы Астана халықаралық форумына қатысуға шақырды.

Қасым-Жомарт Тоқаев меймандармен бірге Құрметті қонақтар кітабына естелік жазба қалдырды.