Касса қызметкерінен төрағалыққа жету: «ҚТЖ»-ның жаңа басшылығына кім тағайындалды?

«Қазақстан темір жолы» ұлттық компаниясының басқарма төрағасы қызметіне Талғат Алдабергенов тағайындалды, деп хабарлайды Orda.kz.

Талғат Алдабергенов 1970 жылдың 10 сәуірінде Батыс Қазақстан облысында дүниеге келген. Алматыдағы Теміржол көлігі инженерлері институтын және Ресей халық шаруашылығы және мемлекеттік қызмет академиясын тәмамдаған.

Еңбек жолын Орал қаласындағы теміржол бекетінде касса қызметкері болып бастаған. Кейінірек бекет бастығының орынбасары, жүк және коммерциялық жұмыстар бөлімінің орынбасары, жол коммерциялық ревизоры қызметтерін атқарған.

1998 жылы «Желдорэкспедиция» мемлекеттік кәсіпорны Ақтөбе филиалы директорының бірінші орынбасары лауазымына тағайындалды. Кейін «ҚТЖ» құрамындағы «Фирмалық көлік қызметі орталығы» Ақтөбе филиалының директоры, сондай-ақ «ҚазМұнайГаз» сауда үйі» АҚ-ның көлік логистикасы департаментінің директоры болды.

2008 жылы «Кедентранссервис» АҚ-ның президенті қызметіне кірісті. Бұған қоса, бірнеше көлік компаниясын басқарды, басқарма төрағасы лауазымдарын атқарды, сондай-ақ «Каспий» тауар биржасы» АҚ президентінің кеңесшісі қызметінде еңбек етті.

2024 жылғы маусым айынан бастап «Қазақстан темір жолы» ұлттық компаниясы» АҚ басқарма төрағасының орынбасары болып жұмыс істеді.

Алдыбергеновтың алдында осы қызметте 2021 жылдан бері істеген Нұрлан Сауранбаев жуырда Қазақстан Республикасының көлік министрі қызметіне тағайындалды.