Каспий жағалауынан өлі кит табылды

Каспий теңізінің Баку жақ жағалауынан алып киттің денесі табылды, деп хабарлайды Orda.kz.

Табылған кит таңертеңнен бері  жүздеген қала тұрғындары мен Баку қонақтарының назарын аударды. Алайда бұл шын кит емес, климаттың өзгеруі жөніндегі БҰҰ конференциясы аясында арнайы дайындалған туынды болып шықты.

Бұл ерекше инсталляцияны Бельгияның Captain Boomer өнер ұжымы теңіз ортасын қорғау және климаттың өзгеруіне назар аударту мақсатында әзірлеген.

2008 жылдан бері бұл туынды Лондон, Париж, Варшава, Аделаида және Мадрид секілді әлемнің ірі қалаларында көрсетілген. Ал Бакуде алғаш рет климаттың өзгеруі жөніндегі конференция аясында ұсынылды.

Айта кетейік, Қазақстан президенті Қасым-Жомарт Тоқаев Климаттың өзгеруі жөніндегі БҰҰ конференциясы аясында өтетін Дүниежүзілік климат саммитіне қатысу үшін Бакуге жұмыс сапарымен келді.