Каспий теңізінде адамдарды құтқарған әскери теңізшілер марапатталды

Каспий теңізінде адамдарды құтқарған теңізшілерді Ақтау портында әскери үрмелі аспаптар оркестрімен қарсы алды, деп хабарлайды ҚР Қорғаныс министрлігінің баспасөз қызметі.

Оларды Қорғаныс министрі атынан Қазақстан Республикасы Қарулы Күштері Әскери-теңіз күштері Бас қолбасшысының міндетін атқарушы, бірінші дәрежелі капитан Қанат Ниязбеков марапаттады. Ол кеме командирі Нұрбек Талғатқа жеке құрамды тамаша теңіз дайындығы үшін және бүкіл экипажға кәсіби шеберлігі үшін алғысын білдірді.

Қанат Ниязбеков штурмандық жауынгерлік бөлімшенің старшинасы, аға матрос Әзімхан Әмірхановқа да сертификат пен бағалы сыйлық табыс етті.

«Гидрометеорологиялық жағдайды түсіндіру және техникалық құралдармен сенімді жұмыс істеу қабілеті оған із-түзсіз жоғалған адамдардың орнын тез және дәл анықтауға көмектесті, ол радиолокациялық станса көмегімен теңіз секторын тексеріп, қиындыққа тап болған адамдарды тапты» деп хабарлады министрліктің баспасөз қызметі.

Естеріңізге сала кетсек, жоғалған спортшылар туралы хабарлама 10 маусым күні әскери-теңіз базасының командирі, екінші дәрежелі капитан Бауыржан Мұратұлынан кешкі сағат 20:00 шамасында келіп түскен. Төрт сағаттан кейін апатқа ұшыраған спортшылар кемеге шығарылды. Олар жағалаудан бес-алты миль қашықтықтағы Скалистый мүйісі аймағында табылды.