Каспий теңізі тоқтаусыз тартылып жатыр

27 қараша 2024 12:08 Альфия Адамбек

Фото: freepik.com

Каспий теңізі 2 метрге тартылды, деп хабарлайды Orda.kz.

Каспий суының тартылуы салдарынан оның тұздылығы артты. Теңіз түбінде қысым азайып, улы газдар шығуы мүмкін. Ал бұл Каспийдің өсімдігі мен жануарларына зиян. Тәуелсіз экологтар теңіз суының нақты тартылу себебін анықтап, оның әсері қандай болатынын шұғыл түрде зерттеу қажет деп дабыл қағып жатыр.

«Біз теңіздің қасында тұратын болғасын көріп тұрмыз, бірақ соңғы 3-4 жылда теңіз тез тартылып бара жатыр. Себебі, мына жердің бәрі су болған. 2021 жылы түсірген фотом бар тастың үстінде тұрған. Сол қазір қарап отырсаң суы 1 метрге төмендеді. Су тез-тез тартылып бара жатыр. Соған алаңдап отырмыз», - дейді Ақтау қаласының тұрғыны.

Мамандардың айтуынша, теңіз тоқтамай тартыла берсе, тұз концентрациясы көбейеді екен. Бұл оның флорасы мен фаунасына зиян. Экологтар сондықтан толыққанды ғылыми зерттеу жүргізіп, Каспийдің маңайындағы елдермен келісе отырып, теңізді сақтап қалу қажеттігін айтуда.

«Каспийге құйылып жатқан судың 80 пайызы Еділден келіп жатыр. Еділден құйылатын су азайғаны анық. Себебі Ресей тарапынан көп мөлшерде су пайдаланатын қондырғылар құрылып, жұмыс істеп жатыр екен. Сондықтан ол жерде Ресей мен Қазақстан жалпы 5 мемлекет арасында келісімшарт жасалып, осындай кедергілерді болдырмау керек деп ойлаймын», - дейді тәуелсіз эколог.

«Қазгидромет» кәсіпорыны Каспий теңізінің гидрометеорологиялық зерттеулер басқармасының мәліметінше, Каспий – 2006 жылдан бері шамамен 2 метрге төмендеген.

Жаңалықтар

барлық жаңалықтар