Каспий теңізін ластанудан сақтау заңмен бекітілді

Мемлекет басшысы Касым-Жомарт Тоқаев «Каспий теңізінің теңіз ортасын қорғау жөніндегі негіздемелік конвенцияға биологиялық әртүрлілікті сақтау туралы хаттаманы ратификациялау туралы»  заңға қол қойды.

Бұл туралы  Orda.kz   Ақордаға сілтеме жасап хабарлады. 

2018 жылғы 12 тамызда Ақтауда келісім бекітілген. Келісім негізі – Каспий теңізінде Әзірбайжан, Иран, Қазақстан, Ресей және Түрікменстанның қарулы күштері әскери кемелерінің жүзуі мен әуе кемелерінің ұшуының қауіпсіздігін қамтамасыз ету.

Хаттаманың негізгі мақсаты - жерүсті көздерінен және құрлықта жүзеге асырылатын қызмет нәтижесінде теңіз ортасының ластануын болдырмау, салдарын азайту, бақылау.

Аталған құжат негізінде бірқатар шаралар қолға алынады:

• ең озық қолжетімді технологиялар мен табиғатты қорғау практикасын пайдалану;
• Каспий теңізінің теңіз ортасы мен жағалау маңындағы аудандарының физикалық, биологиялық және химиялық сипаттамалары туралы, оның ішінде жерүсті көздерінен теңіз акваториясына ластаушы заттардың түсу көлемдері туралы дерекқорды құру және жүргізу; Каспийдің теңіз ортасы мен жағалау маңындағы аудандарының жай-күйіне тұрақты бағалау, оның жағалау сызығы бойындағы теңіздің ластану деңгейіне бағалау жүргізу.

Каспийдің теңіз ортасын қорғау туралы негіздемелік конвенция 2003 жылы қараша айында рәсімделген болатын. Оған Әзірбайжан, Иран, Қазақстан, Ресей мен Түрікменстан қосылды.

Каспий теңізін жер үстінде және құрлықта жүзеге асырылатын қызмет нәтижесінде ластанудан қорғау жөніндегі хаттамаға 2012 жылғы 12 желтоқсанда Мәскеу қаласында қол қойылған.