Қаскелеңнен Алматыға дейінгі жол сегіз жолақты болады

Қаскелең-Алматы бағыты бес көліктік эстакадамен (таға түріндегі бұрылмалы жол) сегіз жолаққа дейін кеңейтіледі, деп хабарлайды Orda.kz ҚР Көлік министрлігіне сілтеме жасап.

Жұмыс екі кезеңде жүзеге асырылады. Бірінші кезеңдегі жол Үлкен Алматы айналмалы көлік жолынан Қаскелең жол торабына дейін, екіншісі Қаскелең жол торабынан Әйтей ауылының бұрылысына дейінгі аумақты қамтиды. Мамандар осы күні сегіз жолақты тас жолды жобалауға кірісіп те кетті.

«Жолды сегіз жолаққа дейін кеңейту көлік қатынасын жақсартып, жол жүру уақытын қысқартады. Бұл учаскедегі өткізу қабілеті тәулігіне 60 мыңнан 90 мыңға дейін артады. Жолды кеңейту көлік кептелістерін азайтады деп күтілуде», - деді министрліктегілер.

Қозғалыс қауіпсіздігі үшін тас жолда 12 жерүсті жаяу жүргіншілер өткелі салынады.