Кәсіпкерлердің коммуналдық тарифы өзгереді

 Қадағалау шаралары мен уәкілетті орган қызметін біріздендірудің арқасында шаруашылық жүргізуші субъектілер үшін коммуналдық қызметтерге тарифтерді есептеудің оңтайлы тәжірибесін қалыптастыруға жағдай туды. 

Бұл туралы Қарағанды облысының прокуратурасы хабарлады. 

«Теміртау қаласында кәсіпкер мектептегі оқушыларды тамақтандыру байқауында жеңімпаз атанды. Жасалған келісім бойынша асхана мен жабдықтар жалға берілген. Келісім шартқа сәйкес коммуналдық қызмет үшін төлемақы үй-жайдың иесі – мемлекеттік органға аударылған. Алайда, бұл кәсіпкерді айтарлықтай негізсіз шығындарға әкелген, себебі бизнес үшін тариф 14 теңге, ал мемлекеттік органдар 90 теңге, яғни 6,5 есе көп» деді прокуратура өз мәлімдемесінде.

Кәсіпкерлік мүддесін қорғау үшін прокуратура келісімшарт талаптарын өзгертуге рұқсат алды. Енді электр энергиясы үшін төлемдер кәсіпкер орнатқан есептегіш құралдардың көрсеткіштері бойынша тікелей жеткізушілерге, ал жылу энергиясы үшін – үй-жайдың ауданына қарай төленеді.

Бұл қабылданған шешім — бір кәсіпкерге жылына 1 миллион теңгеден астам қаражат үнемдеуге мүмкіндік береді.