Қаржы министрлігі «Bazis-A» және «BI Group» компанияларын кірістерін кем көрсетті деп айыптады

«Bazis-A» және «BI Group» құрылыс компанияларына салық салынатын кірісті 16,5 млрд теңгеге кеміткені туралы хабарлама жіберілді, деп хабарлайды ҚР Қаржы министрлігінің баспасөз қызметі. 

«Мемлекеттік кіріс органдары «Bazis-A» компаниясына салық салынатын кірісті 4,6 млрд теңгеге, ал «BI Group» компаниясына 11,9 млрд теңгеге төмендетілгені туралы хабарлама жіберді»,  деп жазылған хабарламада.

Бұл жұмыс 2022-2023 жылдарға арналған арнаулы салық режимдерін қолданатын субъектілер мен жалпыға бірдей белгіленген тәртіпте қызметін жүзеге асыратын компаниялар арасындағы өзара есеп айырысуды талдау аясында жүргізіліп жатқаны хабарланды.

«Талдау көрсеткендей, бұл компаниялар салық төлемдерін азайту үшін арнаулы салық режимдерін пайдаланады», деп жазылған хабарламада.

Еске салайық, 28 ақпанда ҚР Премьер-Министрі Олжас Бектенов ірі бизнес өкілдерін, соның ішінде «Bazis-A» және «BI Group» құрылыс компанияларын қатал сынға алып, салық төлеуге екі апта уақыт берген болатын.