Қарин: Жерді шетелдіктерге сату мәселесіне нүкте қойылды

Президенттің көмекшісі Ерлан Қарин шетелдіктерге жер сату мәселесі аяқталғанын айтты.

Бұл туралы Orda.kz Ерлан Қариннің телеграм каналына сілтеме жасап хабарлады.

– Әлеуметтік желілерде шетелдіктерге жерді сату мәселесі Жер комиссиясы шеңберінде қайта қаралуы мүмкін деген пікірлер бар. Бұл әңгімелердің бәрі - жалған ақпарат пен алыпсатарлық. Осы мәселе бойынша талқылауға нүкте қойылды! 12 наурызда президент өзінің заң шығару бастамасы құқығын пайдаланып, парламентке жерді шетелдіктерге сатуға және жалға беруге тыйым салатын тиісті заң жобасын жіберді, - деп жазды ол.

Қарин бұл заң жобасын «депутаттар бірден қабылдады және қазірдің өзінде белгіленген тәртіпте қаралып жатыр» деді.

– Мәжілісте осы заң жобасы бойынша қоғам қайраткерлері, мемлекеттік органдардың өкілдері, парламенттік емес партиялар мен сарапшылардың қатысуымен жұмыс тобы құрылды. 18 наурызда парламент қабырғасында жұмыс тобының алғашқы отырысы өтті. Процесс қарқынды жүруі үшін осы топтың келесі отырысы бүгін түстен кейін өтуі керек. Ал Жер комиссиясы ауылшаруашылық жерлерін пайдаланудың басқа мәселелерін қарайды, - деді президенттің көмекшісі.

12 наурызда Тоқаев Мәжіліске шетелдіктерге жерді сатуға және жалға беруге тыйым салатын заң жобасын жіберді. Ұлттық кеңестің бесінші отырысында Президенттің негізгі бастамаларының бірі жер мәселесіне қатысты болды.