Кәрім Мәсімовтің зәулім үйінен тәркіленген естелік жазуы бар қару сатылды

11 желтоқсан күні өткен аукционда Ұлттық қауіпсіздік комитетінің бұрынғы төрағасы Кәрім Мәсімовтің зәулім үйінен тәркіленген бірнеше мүлік сатылды. Бұл туралы ақпарат электронды аукцион сайтында жарияланды, деп хабарлайды Orda.kz. 

Аукцион барысында үш лот, яғни тоғыз мүлік  сатылымға шығарылды. Ең жоғары сұранысқа ие болған зат — «Айбалта». Бұл лот үшін жеті сатып алушы бәсекелесті. Бастапқы бағасы небәрі 38 мың теңге болғанымен, сауда нәтижесінде балта 378 мың теңгеге сатылды.

Бұл қарулар, болжам бойынша, Кәрім Мәсімовке сый ретінде берілген. Себебі олардың бірінде сый берушілердің есімдері мен күні қашалып жазылған.

Еске сала кетсек, Кәрім Мәсімов 2022 жылғы Қаңтар оқиғасы кезінде ұсталып, 2023 жылдың сәуірінде Астанадағы сот оны мемлекетке опасыздық жасағаны, билікті күшпен басып алуға талпынғаны және қызметтік өкілеттігін асыра пайдаланғаны үшін 18 жылға бас бостандығынан айырған.