Кәрім Мәсімовтің самурай қылышы аукционда сатылды

ҰҚК экс-төрағасы Кәрим Мәсімовтің самурай қылышы аукционда сатылды, деп хабарлайды Orda.kz.

4 қараша күні электрондық сауда алаңына жалпы құны 520 миллион теңгеден асатын 42 қымбат бұйым қойылды. Олардың қатарында брендтік сағаттар, зергерлік әшекейлер мен люкстік аксессуарлар бар еді.

Сауда нәтижесінде тек бір ғана лот сатылды. Ол — болаттан жасалған, сабына бедерлі геометриялық өрнек салынған қынаптағы самурай қылышы. Қылыш 542,7 мың теңгеге сатылған.

Еске салайық, Астанадағы Кәрім Мәсімовтің вилласын тінту кезінде қару-жарақ, антиквариат, алтын құймалар, сағаттар, картиналар және басқа да қымбат бұйымдар табылған. Аумағы шамамен 2,9 мың шаршы метр болатын үйде бассейн, сауна, дискобар, караоке және жеке сахна болған. Сондай-ақ үйден миллиондаған доллар ақша мен бизнес-класстағы 11 көлік табылған.

Үй мен жер телімінің құны 1,5 миллиард теңгеден асты.