«Қарапайым халық мені қолдайды»: Берденовке оқ атқан Ернар Жиенбай жазаны жеңілдетуді сұрады

Шымкентте Руслан Берденовке жасалған шабуыл ісі бойынша өтіп жатқан сотта күдікті Ернар Жиенбай соңғы сөзін айтты, деп хабарлайды Orda.kz.

Кеше сотта тараптар жарыссөзін өткізіп, өз уәждерін білдірді. Шымкент қаласы әкімінің орынбасары Руслан Берденов алғаш рет оқиға барысын толық баяндап, прокурорлардың сұрақтарына онлайн байланыс арқылы жауап берген еді.

Бүгін сотталушы Ернар Жиенбай соңғы сөзінде істеген ісіне өкінетінін айтып, халықтан кешірім сұрады.

«Жасаған ісім үшін өкінемін. Азаматтарға айтарым – қолдарыңызға қару алмаңыздар, тіпті аңшылыққа да бармаңыздар. Жасаған ісімнің жауапкершілігін толық мойындаймын. Осы оқиға үшін барша қазақ халқынан кешірім сұраймын. Елімізде тек береке, қуаныш пен жақсылық болсын. Қылмыс жасалмасын, қоғам тыныш болсын. Құрметті сот, айтарым көп, бірақ қысқа да нұсқа – Қылмыстық кодекстің 106-бабының 1-бөлігі бойынша әділ әрі жеңіл жаза тағайындауыңызды сұраймын», – деді Ернар Жиенбай.

Үкім ертең жариялануы мүмкін. Прокурор айыпталушыға 11 жыл 3 ай бас бостандығынан айыруды сұрады.