Карантиндік шектеулерге қарамастан Әлия Назарбаева кешкі ас өткізді

Қазақстанның бұрынғы президенті Нұрсұлтан Назарбаевтың қызы Әлия Назарбаеваның кітабының тұсаукесері коронавирустың таралу қарқыны бойынша «қызыл аймақта» орналасқан және карантиндік шектеулер қолданылатын Алматы қаласында 16 қыркүйек күні өтті.

Бұл туралы Orda.kz  Азаттыққа сілтеме жасап хабарлайды.

Пандемия кезінде жаппай іс-шараларға тыйым салынғанына қарамастан, мемлекеттік опера және балет театрының ғимаратында кем дегенде бірнеше ондаған адамның қатысуымен кешкі ас өткізілді.

Ресейлік әртіс Максим Галкин жүргізген кеште қазақстандық бизнесмендер, актерлар, өзге де атақты адамдар көзге түсті. Бағдарламада сондай-ақ қазақ халық аспаптары оркестрі өнер көрсетті.

Әлия Назарбаева өзінің Instagram парақшасында оның алғашқы кітабының тұсаукесерімен бірге «қайырымдылық аукцион аясында Қазақстан өңірлерінде ағаш отырғызуға қаражат жиналды» деп хабарлады.

Әлия Назарбаева таныстырған кітап «Место силы» деп аталады. Автор бұған дейін әлеуметтік желілерде «менің өміріме бірнеше жылдар бойы келген рухани біліммен бөлісемін» деп жазған.

41 жастағы Әлия Назарбаева – Қазақстанның бұрынғы президенті Нұрсұлтан Назарбаев пен оның әйелі Сараның кіші қызы.