Карантин талаптарын сақтамаған екі спортшы Олимпиададан кетті

Грузияның екі дзюдошысы Олимпиада ойындарында COVID-шектеулері мен карантин талаптарын бұзғаны үшін Токиодан кетті.

Бұл туралы ұйымдастырушылар хабарлады. Спортшылар тыйымға қарамастан Олимпиада қалашығының сыртына шығып, қаланы аралаған. Токио мұнарасына барып, оның жанында жергілікті тұрғындармен фотоға түскен. Коронавирус індетіне байланысты шектеу шараларын бұзған спортшылар аккредитациясынан айрылып, еліне қайтарылды. 

Оның біреуі Олимпиаданың күміс жүлдегері Важа Маргвелашвили. Ұйымдастырушы комитеттің өкілі Масанори Такая «сұмдық жағдай» болғанын хабарлады. Сондай-ақ, спортшылардың енді Олимпиадаға қатыспайтынын мәлімделді. 

Олимпиада ережесіне сәйкес, спортшылар жатын орнына және  тек жарыс пен жаттығуға бара алады. Қалаға шығуға, тіпті ескертусіз жүруге де болмайды. Ережені бұзғандарға ескерту жасалады немесе  бірден аккредитациясынан айрылады.