«Қарамағында жұмыс істеген»: Руслан Берденовке кім оқ атқаны белгілі болды

Шымкент қаласы әкімінің орынбасары Руслан Берденовке оқ атқан адамның кім екені анықталды, деп хабарлайды Orda.kz.

Алдын ала мәлімет бойынша, күдікті — 1994 жылы туған Жиенбай Ернар Жиенбайұлы. Ол Шымкент қаласы әкімдігіне қарасты «Тұрғын үй Шымкент» жауапкершілігі шектеулі серіктестігінде маман болып жұмыс істеген.

Сонымен қатар,  Respublica партиясының тең төрағасы, кәсіпкер Бейбіт Әлібековтің жазуынша, Ернар Жиенбай бұрын Руслан Берденовтің тікелей қарамағында жұмыс істеген.

«Қолда бар ақпаратқа сүйенсек, оқ атқан адам әкімдікке қарасты серіктестіктің басшысы болған. Жуырда ғана қызметінен босатылған. Оқ өкпесі мен бауырына тиген. Соған қарамастан, дәрігерлердің айтуынша, өміріне қауіп жоқ» деп жазды Әлібеков.

Еске салсақ,  Шымкентте қала әкімінің орынбасары Руслан Берденовке қарулы шабуыл жасалды. Оқиға 21 сәуір күні кешкі сағат 20:30 шамасында қалалық әкімдік ғимаратының жанында болған. Шенеунік бірнеше жерінен жараланып, жедел түрде ауруханаға жеткізілді. Қазір ол операцияда жатыр.

Руслан Берденовке жасалған қарулы шабуылға дейін оған қоқан-лоққы көрсетілген. Бұл Шымкенттегі құрылыс саласындағы тәртіп орнату әрекетіне байланысты болуы мүмкін.