Қарағандыдағы City Mall орталығында өрт шықты

Қарағанды қаласындағы Бұқар Жырау даңғылында орналасқан «City Mall» сауда-ойын-сауық орталығында өрт шықты. Ғимараттан шамамен 250 адам эвакуацияланды, деп хабарлайды Orda.kz.

Өрт 28 шілде күні тіркелген. Оқиға орнында өрт сөндіру штабы құрылып, су үздіксіз беріліп отырған. Соның нәтижесінде тілсіз жау ауыздықталды. Зардап шеккендер туралы әзірге ақпарат жоқ.

Тілсіз жау сауда орталығының үшінші қабатында тұтанған. Ол жерде балалар киімі мен ойыншық сататын дүкендер орналасқан. Өрттің жалпы аумағы 130 шаршы метр болған. Қазіргі уақытта өрттің шығу себебі анықталып жатыр.

«Өртті сөндіру жұмысына жоғары температура мен қою түтін кедергі келтірді. Қызыл жалынды ауыздықтауға Төтенше жағдайлар министрлігінің 60-тан астам маманы мен 21 техникасы жұмылдырылды», деп хабарлады ТЖМ.