Қарағандыда Ұлттық ұлан қызметкерлері балаларды өрттен аман алып қалды

ҚР ІІМ Ұлттық ұланының 6505 әскери бөлімінің әскери қызметшілері Асхат Байсейітов, Қыдырбай Ерлан, Вячеслав Қожахметов және Михаил Бубнов Долинка ауылындағы жанып жатқан үйден балаларды құтқарып қалды, деп хабарлайды Orda.kz.

Оқиға орнына жедел келіп жеткен гвардияшылар жанып жатқан үйге еш мүдірместен кіріп кетіп, үш баланы аман алып шықты. Айта кетейік, әскери қызметшілер балаларды эвакуациялап қана қоймай, жанып жатқан үйден 50 литрлік газ балонын қоса алып шықты, деп хабарлайды ІІМ баспасөз қызметі.

«Өртті көргенде бірден сол жаққа жүгірдік. Балалар жылап жатты, түтіннен тыныс алу өте қиын болды, бірақ біз бір секундты да жоғалтуға болмайтынын білдік. Біз үшін бұл ерлік емес – бұл бізге күн сайын үйретілетін нәрсе. Біз адамдарды қорғауға ант бердік және кез келген жағдайда осы антқа адал болуға міндеттіміз», - деді гвардияшылар. 

Осылайша, әскери қызметшілердің жедел және батыл әрекеттері ірі қасіреттің алдын алуға мүмкіндік берді.