Қарағандыда студенттер үйі өртеніп, 10 адамды күйік шалды

Бөкетов атындағы Қарағанды университетінің жатақханасы өртенді, деп хабарлайды Orda.kz.

Дереккөздерге сүйенсек, өрттің шығуына қоқыстың өртенуі себеп болған. Салдарынан 10 адам жапа шегіп, Мақажанов атындағы ауруханаға жеткізілді.

Orda.kz тілшісі cол университетте оқитын студенттердің біріне хабарласып, мән-жайды сұрастырды.

«Өрт 3-жатақханада болды. Ол жақта нақты бір факультет емес, әртүрлі факультеттер бар. Бастысы жатақханада орын болса болды, жатқыза береді», – деді студенттердің бірі.

Облыстық денсаулық сақтау басқармасы зардап шеккендердің жағдайы бір қалыпты екенін және олардың өмірлеріне ешқандай қауіп жоқ екенін мәлімдеді. Қазір зардап шеккендер тексеруден өтіп, амбулаториялық ем алғалы жатыр.

Оқиғаның мән-жайы мен өрттің нақты себебін мамандар анықтап жатыр.