Қарағандыда синтетикалық есірткі өндіретін ірі зертхана анықталды

Қарағанды облысында синтетикалық есірткі өндіретін жасырын зертхана анықталды, деп хабарлайды Orda.kz.

Арнайы операция 5 қараша күні Сортировка кентінде өтті. Облыстық полиция департаментінің мәліметінше, есірткі қылмысына қарсы іс-қимыл басқармасы облыстық прокуратураның қолдауымен 28 және 30 жастағы екі тұрғынды ұстады. 

Тергеу деректеріне қарағанда, олар жеке үйді жалға алып, куратордың нұсқауымен және криптовалюта арқылы төлем қабылдап, «альфа-PVP» (халық арасында «скорость» деген атпен белгілі) деген есірткіні өндіріп келген.

«Іске жаңа қосылғандарды, соның ішінде қарапайым азаматтарды курьер немесе жасырғыш ретінде тарту әрекетінің жолы кесілді», – деді есірткі қылмысына қарсы басқарма бастығы Ғалымжан Бекболатов.

Тінту кезінде полиция қызметкерлері бір тоннадан астам есірткі дайындайтын заттар мен 52 келіден аса дайын есірткіні тәркіледі. Бұл шамамен 173 мың доза жасауға жеткілікті. Сондай-ақ таразы, миксер, кептіргіш, вакуумдағыш және басқа да өндіріс құралдары табылды.

Қазіргі уақытта ұсталған екі адамға қатысты қылмыстық іс қозғалып, олар уақытша ұстау изоляторына қамалды. Сотқа дейінгі тергеу жалғасып жатыр.