Қарағандыда екі «әлеуметтік қызметкер» 94 жастағы кейуананың миллион теңгесін үптеп кеткен

Қарағандыда 94 жастағы кейуананың үйіне әлеуметтік қызметкер ретінде кіріп, 1 миллион теңгесін жымқырды деген күдікпен екі әйел ұсталды, деп хабарлайды Orda.kz.       

Полицейлер жедел-іздестіру іс-шаралары мен бейнебақылау камераларындағы жазбаларды зерделеу нәтижесінде күдіктілердің жеке басын анықтаып, олар ұсталды. Оқиға маусым айының соңында болған. 

Полицияға 94 жастағы қала тұрғынының айтуынша, пәтеріне өздерін «әлеуметтік қызметкер» ретінде таныстырған екі әйел келген. Олар қарт әжейдің сеніміне кіріп, ескі үлгідегі ақшаларды жаңасына ауыстыру қажет екенін айтып, үйде сақталған қаражаттың қайда тұрғанын сұраған. Еш күмәнданбаған кейуана жинаған ақшасы тұратын орынды көрсеткен.

Арада көп уақыт өтпей, бейтаныс әйелдер үйден шығып кеткен соң зейнеткер өзіне тиесілі 1 миллион теңгенің жоғалғанын байқап, бірден полицияға хабарлаған.

Аталған дерек бойынша қылмыстық іс қозғалды. Жедел-іздестіру іс-шаралары барысында криминалдық полиция қызметкерлері бейнебақылау камераларындағы жазбаларды мұқият зерделеп, күдіктілердің жүрген бағытын анықтаған. 

Нәтижесінде олардың жеке басы анықталып, күдіктілер ұсталды. Олар Алматы қаласының тұрғындары болып шықты. Қазіргі уақытта сотқа дейінгі тергеу амалдары жүргізіліп жатыр. Полицейлер күдіктілердің Қарағанды облысы мен еліміздің басқа өңірлерінде жасалған осыған ұқсас қылмыстарға қатысы бар-жоғын тексеруге кірісті. 

Полиция азаматтарды, әсіресе егде жастағы туыстарын алаяқтардың кең таралған айла-тәсілдері туралы алдын ала ескертіп отыруға шақырады. Олар өзін әлеуметтік қызметкер, коммуналдық қызмет немесе өзге мемлекеттік мекеме өкілі ретінде таныстырған бейтаныс адамдарды үйге кіргізбеуді сұрайды.

Ақшаңыздың немесе бағалы заттарыңыздың қайда сақталғанын көрсетпеңіздер. Күмәнді жағдай туындаса бірден «102» арнасына хабарласқан абзал.

Оқи отырыңыз:

• Алматыдағы сел қаупі, елдегі жауын-шашын: Бектенов шұғыл кеңес өткізді
• Адам өліміне әкелген жарылыстан кейін «Қазмырышқа» миллиондаған айыппұл салынды